«Рæстдзинад»

Цæгат Ирыстоны Абайты Васойы номыл гуманитарон æмæ социалон иртасæнты институты кусджытæ рауагътой алан-ириртасынады æрмæджытимæ чиныг "Алания от А до Я".

Институты директор Хъаныхъуаты Зæлинæйы Залина Канукова ныхасмæ гæсгæ, чиныгмæ хаст æрцыдысты институты ахуыргæндты иртасынадон куыстытæ, стæй фæсарæйнаг кавказиртасджыты æрмæджытæ. Уыдон амæй размæ фондз азы дæргъы мыхуыргонд цыдысты нæ республикæйы цæуæг газеттæ æмæ журналты. Чиныгмæ бахастæуыд адæмон сфæлдыстады æрмæг: ирон аргъæуттæ, æмбисæндтæ, зарджытæ æмæ Нарты кадджытæ. Æрмæджыты автортæ спайда кодтой алантæ-ирæтты тыххæй фыдыбæстон æмæ фæсарæйнаг авторты æвдисæнтæй, стæй археологон иртасæнты бæрæггæнæнтæй. — Чиныг "Алания от А до Я"-йы сæйраг хæс у культурон, удварнон æмæ идеологон æууæлтыл нымад историон-культурон бынтæ бахъахъхъæнын æмæ сæ бабиноныг кæнын, стæй алайнаг-ирон историйы къабазы бындурон иртасæнты æрмæджытæ дзыллæтæм бахæццæ кæнын, — загъта Хъаныхъуаты Зæлинæ Залина Канукова. Паддзахадон программæ "2021-2025 азты ирон адæмы национ-культурон рæзт"-мæ гæсгæ Дзæуджыхъæуы рауагъдад "Проект-Пресс" амынд чиныг рауагъта 300 экземпляры бæрц тиражæй. 

Нæ уацхæссæг.

Рæстдзинад. 2022. № 8 (20 январ)